انتشرت الفترة الأخيرة على قنوات التلفزيون وعلى النت حركات كتير جدا بتدعو لمواجهة ظاهرة التحرش بالنساء، والحركات دى الغرض منها اللى بتقوله طول الوقت هو وقف ظاهرة التحرش بالنساء والفتيات وكل الكلام اللى احنا بنسمعه اليومين دول

الحقيقة بقى ان التحرش مش ظاهرة ولا حاجه زى ما كل الناس دى بتقول 

التحرش سلــــوك

زى أى سلوك احنا بنمارسه من زمان فاتعودنا عليه وبقى عادى اننا نمارسه 

التحرش ما فرقش عن الزباله اللى بنحرقها، ولا الطريق اللى بنتف عليه، ولا محطات المترو اللى بنكتب عليها ولا يفرق عن أى حاجه عجيبة من الحاجات اللى بنعملها دى، ده أولًا.

ثانيًا بقى وده مهم جدا وهو ليه المتحرش دايما بيتحرش؟

الموضوع مش جديد انا عارف لأن   زى ما قلت فوق من شوية ان الموضوع ده هو  اللى على الساحة فى الوقت الحالى وفيه ناس كتير بتتكلم عليه وطبعا اشهر المبررات لبس البنت ومشيتها وموضوع الشباب هيعمل ايه ما هو عنده كبت واشهر الردود على الحجج دى وانت ممكن ما تبصش وقعدتها فى البيت مش حل وان هى كمان  عندها كبت ولازم تخرجه 

المشكلة التانية فى سلوك التحرش ده هو سؤال فى دماغى من زمان وهو؟

ايه وجه المتعه اللى المتحرش بيوصلها لما بيتحرش سواء بنظرة ولا كلمة ولا فعل وبالذات موضوع فعل ده 

يعنى ايه متعته فى انه يحط ايده على جسم واحده؟ وتاخد بالها ويا اما تشتمه وساعتها تبقى بجحه ووشها ومكشوف يا اما تسكت وتبقى ساعتها مبسوطه  (من وجهة نظر اللى بيتحرش) يعنى هو صاحب الفعل والحكم

فعليا ما فيش أى وجه متعه انك تحط ايدك على واحده ماشية فى الشارع ولا فى المترو ولا الميكروباص ولا أى زفت على دماغك

وبعدين السؤال التانى اللى بيجى فى دماغى بالنسبة للمتحرش

هو بينزل من بيتهم عايز يتحرش ولا بيسخن على حاجه فى وسط اليوم؟

ولو افترضنا انه بيسخن على حاجة فى وسط اليوم

الموضوع بسيط

ما انتوا طول عمركوا عايشين فى كبت ومحرومين م اللحمه محدش منكو ليه بيلمس اللحمة بدل ما يشتريها  ؟

محدش طبيعى هيعمل كده عشان مش هيشبع 

واللى هيعمل كده هيبقى معتوه

ولما فكرت فى الموضوع الأساسى اللى هو 

ليه المتحرش ممكن يتحرش بالرغم من انه ممكن يكون اب أو زوج واخ وطبعا بخلاف كل المواضيع اللى معروفة من ازدواجية فى موضوع انا راجل واعمل اللى أنا عايزه واتصرف براحتى وانتى تسمعى الكلام وما تتناقشيش وكيفى كده وما تكلميش حد وما تخرجيش مع حد وما تصاحبيش حد والبسى ايه وما تلبسيش ايه ده فى حد ذاته تحرش بيتمارس من البيت لأن التحرش مش لازم يكون انك تمسك حد من (مكان حساس) على الرغم انى شايف ان كل الجسم حساس لو واحد مسك واحده من مناخيرها هتتضايق برضه ولو واحد عقب بطريقة سخيفه على رأى واحده ده برضه اسمه تحرش فكرى ده غير طبعا اللسان الطويل اللى بيسموه تحرش لفظى.

ولما قعدت أحلل شوية الشخصيات اللى بتعمل ده لقيتهم طبعا معظمهم رجاله لأن عمرنا ما شوفنا مثلا فى الشارع شلة بنات ماشية وبتشد شاب من ايده ولا بتحط اديها على شعره ولا بتمسكه من (الأمبوله) عشان هى عندها كبت ولا الواد لابس ضيق ولا ماشى (بيتمرقع) عارفين ليه البنات مش بتعمل كده والرجاله هى اللى بتعمل كده؟

عشان الرجاله ما عندهاش احساس بالذنب ، وعشان الرجالة بجحه عن البنات يعنى مثلا عمرك ما هتلاقى بنت واقفه فى الشارع وفاتحه سوستة البنطلون وبتعمل زى الناس !! لكن هتلاقى راجل هو اللى بيعمل كده وممكن واحد صوره زى ما احنا شايفين.

لأن البنت نفسها تتكسف تعمل ده مش عشان عيب ولا ما يصحش لأنه لو عيب وما يصحش يبقى الراجل كمان المفروض ما يعملوش لكن هو بيعمله ولو البنت هى اللى عملت كده، ساعتها هتلاقى مليون حل طلع ومليار اقتراح اتقال وشنكليار حركة عشان تقاوم الظاهرة دى وعلى فكرة الطرطرة فى الشارع اللى الراجل بيعملها دى سلوك برضه مش ظاهرة

كلمة ظاهرة فى حد ذاتها تديك الايحاء انها حدث عابر وهيختفى لكن السلوك بيبقى عايز علاج ومتابعة عشان يتعّدل ويبقى سلوك بنى آدمين مش نسانيس