مالهاش علاقة بالموضوع بس انا ما بحطش صور بتوع السياسه 

من كام يوم طلع العاهل الأردنى (بغض النظر عن اللقب اللى انا مش فاهمه) فى لقاء مع صحفى امريكى وقال ان الرئيس المصرى ما عندوش عمق (ويفتقر الخبره الواسعه) ومره واحده الدنيا اتقلبت على العاهل الأردنى وعلى الكلام اللى قالوا.

انا ببص للمواضيع بشكل مختلف شويه وشايف ان الناس اللى انفعلت عشان الموضوع ده ما عندهاش أى سبب تنفعل عشانه ليه

أولا: هو فعلا ما عندوش خبره كرئيس جمهورية

ثانيا: هو فعلا منفصل عن الواقع اللى الناس عايشاه فى مصر

ثالثًا: زى ما كلنا عارفين جاز اند الكحول دونت ميكس

وبغض النظر عن كل الكلام اللى اتقال على لسان (العاهل الأردنى) الا ان الموضوع تحول من نقد الى (شتيمه) وده الطبيعى وده المثير للاهتمام والسخريه.

وعشان انا مفسى دماغى من السياسه ومش عايز اكتب فيها عشان كلها (هتش×هتش) وكلام فارغ وضحك على المعاتيه اللى مصدقين نفسهم لكن حتى فى الموقف ده لقينا كالعاده الناس اللى بتسمى نفسها (معارضه) حزينه على الكلام اللى اتقال لان ده (بيهز) صورة مصر (على اساس ان مصر صورتها مش مهزوزه خلقه) وده برضه بيجى فى الوقت اللى الشعب كله بيتريق على (مرسى) وبيقول عليه نحس على الدول اللى بيروحها زى اللى حصل فى الزيارات اللى هو بيعملها لدول  انا مش عارف ايه وجه الاضافة اللى هتعود علينا من زيارته ليها 

والتفسير المنطقى للى الناس عملته كرد فعل على كلام (العاهل الاردنى) هو تطبيق حرفى للمثل الشعبى الجميل (ادعى على ابنى واكره اللى يقول آمين) احنا نشتمه ونغلط فيه ماشى لكن محدش تانى غيرنا يعمل ده 

اهو غتاته كده

احنا لسه بدرى علينا على بال ما نخلص من عقدة الكبير واكبر منك بيوم يعرف عنك بسنه وعيب ده زى ابوك وما يصحش ده رئيس الجمهورية وكل الكلام ده فى حين ان معظم الناس فى الاتوبيسات والمكروباصات والمترو والشارع بتسب وتلعن اليوم اللى بقى فيه رئيس جمهورية، لكن محدش غيرنا يعمل كده

كلام العاهل الأردنى على رئيس مصر عيب وكلام شعب مصر على اوباما ونتنياهو وبيريز وموزة وجوزها واى حاكم لاى بلد مش عيب عارفين ليه؟

عشان انا واخويا على ابن عمى وانا وابن عمى ع الغريب

والموضوع ده مش جديد

الازدواجيه دى مش جديده علينا 

احنا بنعشق الازدواجيه زى ما بنعشق الفول والكشرى والسمين والحلبسه والكبده و(المُخ) اللى كل علاقتنا بيه اننا ناكله سندوتشات مش اكتر من كده

-->

ده مثل شعبى احنا بنقوله لبعض لما يكون حد بيطلب من حد حاجه أكبر من امكانياته ويرد عليه ويقوله (كل برغوت على قد دمه) انا بقى بقف قدام المثل ده وبفكر فيه بشكل تانى لأنى عمرى ما فهمت ايه علاقة المثل ببعضه؟ وايه علاقته بالحكمه اللى المفروض نستفيدها منه؟

وليه تحديدًا اخترنا البرغوت عشان نضرب بيه المثل وسألت ناس فعلا على الموضوع ده وعمر ما حد ادانى أى رد منطقى لأن غالبا كلهم كانوا بيقولا نفس الجمله ( أهو مثل وقالوا من زمان) أو ايه المشكله يعنى ايه اللى مش مفهوم  فى المثل؟

المشكلة 

انها اولا نفس ثقافة (معاك قرش تسوى قرش) اللى برضه بالنسبه لينا حكمة بنتعلمها على أساس ان اللى قالها زمان ده بيفكر أحسن مننا لأن كونا نرجع السبب فى انها لازم تتقال عشان اللى قالها قالها من زمان يبقى احنا مش عايزين نفكر النهارده 

اللى معاه قرش بيروح يدفعه عشان ياكل ويشرب ويشترى ويبيع منتجات هو محتاجها بالفعل يعنى انت لما بتروح تدفع فلوس بتدفعها عشان تشترى منتج مش تشترى فلوس يعنى لو معاك مليار جنيه ومافيش ميه على كوكب الأرض يبقى مالهومش اى لازمه

لو معاك مليار دولار وحصل بركان مش هتعرف توقفه لو دمر لك كل شيء تملكه 

الانسان هو اللى اخترع القرش عشان يشغل نفسه بيه عن حاجات كتير وزى اى حاجه الانسان بيعملها عشان يشغل نفسه عن اللى فات او اللى جاى ابتدينا نخلى (قيمة) القرش اللى احنا اخترعناه هى معيار تقييم (لإنسان) زيك زيه بس انت معاك شويىة قروش أكتر منه فابتديت تزله بطريقه غير مباشره واهو فى نفس الوقت هو مجبر انه يفضل شغال زى الطور عشان يبقى زيك فاصبحت انت قدوه بالقوه على الشخص ده عشان تورثه ثقافتك اللى انت قبلتها من غير ما تفكر فيها ولا تاخد وقت من حياتك ولو حتى بشكل ساخر  واصبحت كل حاجه عندنا شبه مقدسه اولها الفلوس واخرها لسه ما خلصش عشان الموضوع مش فرق فى الفلوس بس لأ الفرق فى حاجات تانيه كتير زى المستوى الاجتماعى، المستوى التعليمى مع الوضع فى الاعتبار ان مش احنا اللى بنقرر معيار النجاح ايه لأننا بندرس فى نفس اطار المراجع اللى اتكتبت برضه من زمان واعتبرناها الأساس اللى بناخد منه كل ثقافتنا ونسينا اننا عايشين دلوقى.

وعلى فكره 

 أنا قررت النهارده اغير المثل ده واخليه 

كل خرتيت على قد أكله

اهو الخرتيت حاجه كبيره وتملى العين بدل البرغوت ما مش باين

واهم من ده كله لما يبقى المعيار أكله يبقى يدى انطباع عن حجم اسنهلاكه لحاجه اساسية عشان يعيش بدل ما يبقى دمه اللى بيزود نزعة العنف وحب رؤية الدم وأذية خلق الله بداعى وبدون داعى

ولو حبينا نشيل النزعه الحيوانية ممكن نقول 

كل انسان على قد فعله

لكن طول ما بنختار نقلل من شأننا ونصغر من حجمنا  وحجم حلمنا علشان نفضل ناسيين اننا كلنا بشر وكلنا حاجه واحده وما فيش ما بينا فرق 

وان كل الاختلافات اللى بنفضل نسمعها طول الوقت احنا السبب فيها 

وان احنا اللى بنموت علشان مصالح الناس التانيه اللى بتقرر ندرس ايه ونتعلم ايه ونقول ايه وما نقولش ايه ونلبس ايه ونتكلم ازاى

هنفضل مقتنعين ان كل برغوت على قد دمه حكمة لازم نتوارثها زى حاجات تانيه كتير