يمكن عشان موضوع الجيل الموكوس ده اداس كتير كلام فى كذا مكان وعلى لسان كذا انسان فانا حبيت أمشى عكس التيار واتكلم المره دى على جيل السمنه البلدى

الجيل اللى اتفرج على أفلام اسماعيل يس فى السيما وقعد على القهاوى ودخل المسارح وكان عنده ساحات شعبيه بيلعب فيها رياضة 

الجيل اللى كان بيروح يعمل مراهنات على سباق حصنه وكان بيشرب سجاير لف وسكان بيشترى اللوتريه عشان يكسب البريمو

الجيل اللى كان بيصيف فى راس البر وبيسهر فى كازينو الشجره وبيرقص تشاتشا وروك اند رول 

الجيل اللى كانت الستات فيه تلبس شارلستون وميكروجيب ومينى جيب ومحدش كان يقدر يتحرش بيهم عشان اخته وامه ومراته لابسه كده وعادى 

الجيل اللى كان بيشتغل بعد ما يتخرج وكان بيشتغل بالابتدائية والاعدادية 

الجيل اللى جاب فى فرحه رقاصة وكان بيتبسط بسامية جمال وتحيه كاريوكا وكيتى وسحر حمدى  وبيحترم فنهم 

الجيل اللى كان بيقبض 5 جنيه و 6 جنيه وساكن فى شقه 4 أوض ومتجوز ومخلف وبيتفسح وبياكل وبيشرب

الجيل اللى كان بيشترى الحاجه بالرطل والأوقيه وكان بيدفع بالمليم والتعريفه والقرش صاغ 

الجيل اللى كان يبياكل سمك باكالا ويشرب سباتس

الجيل اللى شهد نهضة باتا وعمر افندى وصيدناوى وشمله وشيكوريل وكان بيجيب منهم كل حاجه

الجيل اللى كان وهو بيقفل التليفون بيقول أوروفوار وكان رقم تليفونه بالكتير 5 أرقام

الجيل اللى كان كله بيبلس بدل أو جلاليب 

الجيل اللى شكرى سرحان عمل فيه طالب فى جامعه

الجيل اللى شرب قهوة ساعة العصارى

الجيل اللى كان بيستنى الست من الشهر للشهر ويستنى عبد الحليم كل ربيع

الجيل اللى كان بيسمع ألفيس بريسلى والبيتلز 

الجيل اللى اتجوز وخلف وشاف ولاده وولاد ولاده وهو بينقلهم كل خبرته فى الحياه عشان يوجههم للطريق الصح

الجيل اللى عمل كل حاجه هو عايزها فى حياته فى عز احتلال ولما اتحرر ربى كل الأجيال اللى بعده على 

ياواخد قوتى يا نواى على موتى

اطعم الفم تستحى العين

يغور اللبن من وش القرد

يا ما جاب الغراب لأمه

بكره نقعد جنب الحيطه ونسمع الزيطه

اللى ليه ضهر ما يضربش على بطنه

الجيل اللى لما شهد الانفتاح جاب كل حاجه من بره وما فكرش يطلع حاجه بره

الجيل اللى اشترى لولاده السيريلاك والنيدو والبامبرز عشان يريحه وبرضه وفرله كنتاكى ومؤمن وهارديز وماك عشان يريح دماغه من الطبيخ بالسمنه البلدى

الجيل اللى وصل الدنيا قبل الجيل اللى عايش دلوقتى وادى نفسه الحق فى ان هو اللى يعمل كل اللى هو عايزه عشان اللى أكبر منك بيوم يعرف عنك بسنه (حتى لو عنده تأخر عقلى) طالما سنه كبير يبقى بيفهم عنك بحكم خبرته فى الحياه ولما جيت تقول قرفت وزهقت واتخنقت وعايز أطير 

اتقلبت الآيه وبدل ما يبقى رئيس الجمهورية 30 سنه بقى معدى الخمسين بدل ما نحصد اللى زرعناه ونحمله على عربية ونمشى حصدناه وحطيناه قدامنا لحد ما جه نفس الجيل وخد اللى تعبنا فيه ضرب واهانة وكرامه ضايعه وبيات فى أقسام هو اللى بناها ونعيش فى شقق هو اللى قرر ذوقها عشان بتوفرله فلوس فى البنا وبعد ما باعها اشتراها لنفسه (عشان هو عمل فلوس قبل منك) عشان بعد ما يبنيها ويبيعها لنفسه يقوم بايعهالك انت ب100 ألف جنيه وكده يبقى كارمك مع ان هو كان بيسكن ب2 جنيه 

يبنيلك مدرسة عشان تعلم ابنك اللى هو قرر انه يتعلمه عشان تدفعله فلوس

يبنيلك قرية سياحية على شاطئ عشان تدفع تمن نومتك مع انه كان ما يعرفش حاجه اسمها قريه سياحية ولا حتى فندق خمس نجوم

يبنيلك مولات فيها محلات وبراندات عالميه عشان تدخل المول وتدفع كل الفلوس اللى معاك فى حاجات انت أصلا مش محتاجها عشان تكسل أكتر ويبقى عندك وقت لو قاعد فى البيت تتفرج على قناه بتعرض منتج انت مش محتاجه بس تروح نازل مشتريه بعديها بيوم

يستوردلك كل اللى انت محتاجه من أول الشاى لحد المقوى الجنسى المهم يحسسك انك مرتاح عشان ما تفكرش ولما تفكر يضربك عشان هو الكبير واللى عنده خبره فى حين ان الخبره اللى خادها خادها فى ظروف هو ما عملش فيها حاجه غير المباركه 

الجيل اللى كل السمنه البلدى وعمل كل الكلام ده هو الجيل اللى معاه فلوس 

أنا عمرى ما سمعت عن رجل اعمال عنده 20 سنه فى مصر بالذات 

عمرى ما صادفت مستثمر عنده 25 سنه 

الجيل ده بقى شغال عشان يعمل اللى بيقوله عليه جيل السمنه البلدى شغال مبيعات وخدمة عملا يعنى نص الشباب بيبع حاجات هو مش فاهمها لناس مش محتاجها عشان لما تبوظ يتصل بواحد تانى حاجفظ حوار يقوله عشان يطمن المشترى ولازم يبقى بارد ويستحمل الشتيمه عشان (الزبون دايما على حق) وطبعا لما يتحمل الشتيمة كرامته هتضيع وهيستحمل أى حاجه 

طريقة جديده للسيطره غير اللى اتمارست معاه وده كله بيندرج تحت مسمى (سنة الحياه) الكلمة اللى بنقولها عشان اللى قدامنا يسكت

فى أخر الموضوع أحب أقول لجيل السمنة البلدى 

شكرا على كل حاجه عملتوها عشان نعيش لكن أبوس ايديكوا سيبونا نعيش زى ما احنا عايزين ما تفرضوش علينا لبسنا ولا شكلنا ولا تحطوا فى دماغكوا احنا جينا وزحمنا الدنيا وخلاص 

شكرا على كل المجمعات السكنية اللى بنتوها عشان تكسبوا سيبونا بقى نرتبها بمزاجنا

شكرا على كل الشعارات الوطنيه اللى زرعتوها جوانا (بالعافيه) احنا عارفين نحب البلد دى لأن البلد دى مستقبل ولادنا اللى ما بقيناش عارفين هنخلفهم ولا لأ عشان احنا اللى بنموت وانت اللو عايشين ودى حاجه لا تتناسب مع (سنة الحياه) مش كده ولا إيه؟

استريحوا فى البيت وخدوا معاشكم واتفرجوا على التليفزيون والعبوا طاوله ودومنه واتفرجوا على ماتشات الكوره احنا مش عايزين دورى ولا كاس إحنا عايزين يبقى لينا كرامه من غير ما يكون لينا ضهر

احنا عايزين نعيش زى ما انتوا عيشتوا أظن ده حقنا